ಹೊಸತೇಕೆ!

ಕನ್ನಡಿ ಹೊಸತಾದರೇನು

ತೋರುವ ಬಿಂಬ ಹೊಸತೇ !

ರೂಪ ಹೊಸತಾದರೇನು

ನೋಡುವ ನೋಟ ಹೊಸತೇ!

ಬದುಕೇ ಹಳತಾಗಿರುವಾಗ

ಬಯಕೆ ಹೊಸತೇಕೆ ಇನ್ನಾ!

ಇಂದು ಹೊಸತಾದರೇನು

ನಾಳೆ ಹಳತಲ್ಲವೆ ಚಿನ್ನ!

         -- ಮಂಜು ಹಿಚ್ಕಡ್

ನಿನ್ನೊಲವ ಹರಕೆ

ನೀನು ನನ್ನೊಳಗಿರಲು
ನನ್ನಲೊವ ಪರಿಯೇಕೇ
ನೀ ತಿಳಿಸದಿರಲು ತಿಳಿಯುವುದು
ನಿನ್ನೊಲವ ಬಯಕೆ

ಆತುರದೀ ಆರದಿರು
ಕಾತುರದೀ ಕಾಯದಿರು
ತೀರಿಸುವೆನು ಮೌನದಿ
ನಿನ್ನೊಲವ ಹರಕೆ!

                                                                                                            --ಮಂಜು ಹಿಚ್ಕಡ್

ಆಧಾರ

ಈ ತಿರುಬೋಕಿ ಬದುಕಿಗೆ 

ನೀನಿರಲು  ಆಧಾರ

ಕಾಪಿಟ್ಟ ಕನಸುಗಳ 

ಮೇಘ ಮಂದಾರ!

-- ಮಂಜು ಹಿಚ್ಕಡ್

ಹುಡುಕಾಡೋ ಮನವೇ

ಹುಡುಕಾಡೋ ಮನವೇ

ಹುಡುಗಾಟವೇಕೆ !

ಕನಸುಗಳ  ಸಂತೆಯಲಿ

ನೀ ನೂಕುವೆ  ಏಕೆ!

-- ಮಂಜು ಹಿಚ್ಕಡ್

ಮತ್ತದೇ ಪ್ರೀತಿ

ಮತ್ತದೇ ಪ್ರೀತಿ,

ಮತ್ತದೇ ಮುನಿಸು

ಮತ್ತದೇ ಮಾತು,

ಮತ್ತದೇ ಮೌನ

ಮತ್ತೆ ನೀ ಜೊತೆಗಿರಲು! 

-- ಮಂಜು ಹಿಚ್ಕಡ್

ಸಂಧ್ಯಾಕಾಲ

ಮುತ್ತು ಕೇಳೋಕೆ

ಹೊತ್ತು ಕಳೆಯೋಕೆ

ಇದುವೆ ಸಂಧಿಕಾಲ

ಅದುವೆ ಸಂಧ್ಯಾಕಾಲ

-ಮಂಜು ಹಿಚ್ಕಡ್

ಬಂದು ಜೊತೆಯಾಗದಿರು

ಬರದಿರು,
ಬಂದು
ಜೊತೆಯಾಗದಿರು
ನೀ ನನ್ನ ,

ಕತೆಯಾಗುವೆ

ನೀ,

ನನ್ನ ಜೊತೆ

ಇನ್ನಾರಿಗೋ

ಚಿನ್ನ!

                          -ಮಂಜು ಹಿಚ್ಕಡ್

ಹೊತ್ತು ನಡೆವವಗೆ ಗೊತ್ತು

ಹೊತ್ತು ನಡೆವವಗೆ ಗೊತ್ತು
ಹೊತ್ತ ವಸ್ತುವಿನ ಭಾರ!
ದುಃಖ ಹೊತ್ತವಗೆ ಗೊತ್ತು
ಕಣ್ಣ ಕಂಬನಿಯ ಭಾರ!

-ಮಂಜು ಹಿಚ್ಕಡ್

ಮತ್ತದೇ ಮಳೆ

ಮತ್ತದೇ ಮಳೆ

ಮತ್ತದೇ ನೀರು

ಈಜಿ ಜೈಸುವ ಆಸೆ

ಎಂದಿನಂತೆ

ಮತ್ತೆ ಈ ಮನಕೆ

ನಿನ್ನ ಕಂಡಾಗಲೆಲ್ಲಾ.

-ಮಂಜು ಹಿಚ್ಕಡ್

ಹೀಗೊಂದು ಪ್ರಶ್ನೆ!

ಮೋಡವಿರದ ಭಾನಲುಂಟೇ
ಕೋಲುಮಿಂಚಿನ ಆಟವು,
ಪ್ರೀತಿಯಿರದ ಬಾಳಲುಂಟೇ
ಆತ್ಮತೃಪ್ತಿಯ ಭಾವವು.

-ಮಂಜು ಹಿಚ್ಕಡ್

ಯೋಚಿಸು ಒಮ್ಮೆ!

ಚಾದರವನ್ನೆಳೆದು, ಮುಸುಕನೊದ್ದು
ಮಲಗುವ ಮುನ್ನೊಮ್ಮೆ ಯೋಚಿಸು
ಕಳೆದಿರುವ ನಿನ್ನೆಗಳ ಬಗ್ಗೆ
ಬರಲಿರುವ ನಾಳೆಗಳ ಬಗ್ಗೆ.

ಸರಿದೋಗಬಹುದೇನೋ
ಮನವನಾವರಿಸಿ ಕುಳಿತಿರುವ
ಚಿಂತೆಗಳ ಮುಸುಕು...

--ಮಂಜು ಹಿಚ್ಕಡ್

ಅವಳ ಚಲುವಿಗೆ ಸೋತು

ಅವಳ ಚಲುವಿಗೆ ಸೋತು
ಧರೆಗಿಳಿದು ಬಂದ
ಆ ಚಂದಿರನಂದ,
ನನ್ನನ್ನಿರಲೀ, ಅವಳನ್ನಿರಲೀ
ದೂರದಿಂದ ನೋಡಿದರಷ್ಟೇ
ಭಲು ಚಂದ.

-ಮಂಜು ಹಿಚ್ಕಡ್

ಸಂಸಾರ ಸಾಗರದಲ್ಲಿ

ಸಂಸಾರ ಸಾಗರದಲ್ಲಿ
ಇದ್ದು ಜೈಸುತ್ತೇನೆ
ಅನ್ನುವುದಾದರೆ
ಅದಕೆ ಬದ್ದನಾಗು.
ಇಲ್ಲಾ ಇದ್ದುದೆಲ್ಲವ ಬಿಟ್ಟು
ಈಗಲೇ ಬುದ್ದನಾಗು.

--ಮಂಜು ಹಿಚ್ಕಡ್

ವಿದ್ಯುತ್ತು

ಏನಿದ್ದರೇನು ನಮ್ಮ ವಿದ್ವತ್ತು

ಮನೆಯಲ್ಲಿದ್ದರೆ ತಾನೇ ವಿದ್ಯುತ್ತು

ಮನೆಗೆ ಬಂದು ಬರೆಯುವ ಚಿಂತೆ

ಮನೆ ತಲುಪುವಷ್ಟರಲ್ಲಿ ವಿದ್ಯುತ್ತೇ ನಾಪತ್ತೆ....

--ಮಂಜು ಹಿಚ್ಕಡ್

ಈ ಜೀವನ!

ನಮ್ಮ ಈ ಜೀವನ.
ನೀನಿತ್ತ ಬಿಕ್ಷೆಯೋ,
ನಾನಿತ್ತ ರಕ್ಷೆಯೋ,
ಎಂದು ಹುಡುಕಿ,ಹುಡುಕಿ
ಸವೆದು ಹೋಗಿದೆ
ನನ್ನ ಪಾದರಕ್ಷೆ.

--ಮಂಜು ಹಿಚ್ಕಡ್

ಎಣ್ಣೆ!

ಚಿಕ್ಕದಿರಲಿ,
ದೊಡ್ಡದಿರಲಿ,
ಬತ್ತಿ, ಹೊತ್ತಿ
ಉರಿಯಲು ಬೇಕು
ಪಾತ್ರೆಯಲ್ಲಿಷ್ಟು ಎಣ್ಣೆ.

--ಮಂಜು ಹಿಚ್ಕಡ್

ಪಯಣ

ಬೆರಳ ನೇವರಿಸಿ
ಮುಂಗುರುಳು ತೀಡಿ
ಆತರಿಸಿ, ಹುಚ್ಚೆದ್ದು
ಗಮ್ಯ ಸೇರುವ ಹೊತ್ತಿಗೆ
ಸೂರ್ಯ ಕಂತಿದ್ದ
ಚಂದ್ರ ನಕ್ಕಿದ್ದ.

--ಮಂಜು ಹಿಚ್ಕಡ್

ಮುತ್ತಿನ ಮತ್ತು.

ಮುತ್ತಿನ ಮತ್ತು

ಬಲು ಗಮ್ಮತ್ತು

ಅದು

ನನ್ನವಳಿಗಾದರೆ

ತಪ್ಪಿ

ಇನ್ನೊಬ್ಬಳಿಗಾದರೆ

ಮೊದಲು

ಕಾದಿಹುದು ಆಪತ್ತು,

ಬಳಿಕ ವಿಪತ್ತು.

--ಮಂಜು ಹಿಚ್ಕಡ್

ಬೀದಿ ದೀಪ

ಮಧ್ಯಾಹ್ನವಾದರೂ ಉರಿಯುವುದಿಲ್ಲಿ, ಬೀದಿ ದೀಪ
ಹೇಳಿ ಕೊಳ್ಳಬೇಕಾಗಿದೆ, ನಮಗೆ ನಾವೇ ಸಂತಾಪ.
ಹುಣ್ಣಿಮೆಯ ಬೆಳದಿಂಗಳೊಡನೆ, ರಸ್ತೆ ದೀಪಗಳ ಸುಗ್ಗಿ
ಅಮವಾಸ್ಯೆ ಬಂದರೆ ಹುಡುಕಬೇಕು ರಸ್ತೆ, ತಗ್ಗಿ ಬಗ್ಗಿ!

--ಮಂಜು ಹಿಚ್ಕಡ್

ನಾಚಿದ ಅವಳ ಮುಖ!

ನಾಚಿ ತಗ್ಗಿಸಿದ
ಅವಳ ಮುಖ
ಇಳಿ ಸಂಜೆಯ
ನಾಚಿಕೆ ಮುಳ್ಳಿನ
ಎಲೆಯಂತೆ.

--ಮಂಜು ಹಿಚ್ಕಡ್